Бид Боловсролын яамнаас баримталж буй бодлогын хүрээнд дээд болон техникийн боловсролын байгууллагуудын уялдаа холбоог сайжруулах, шаталсан сургалтыг хэрэгжүүлэх замаар суралцагчдад дээд боловсрол эзэмших боломжийг олгох чиглэлд ажиллаж байна.

Өнгөрсөн онд Дархан-Уул аймаг дахь Дархан Политехник коллежтой хамтран энэхүү ажлыг эхлүүлж байсан бол энэ удаад Говьсүмбэр аймаг дахь Политехникийн коллежтой хамтран ажиллахаар боллоо. Хамтран ажиллах гэрээнд 2025 оны 06 дугаар сарын 23-нд гарын үсэг зурсан бөгөөд техник, мэргэжлийн боловсролоос бакалаврын түвшинд шууд шилжин суралцах боломж бүрдэж байна. Дараах чиглэлээр харилцан дэмжлэг үзүүлж ажиллахаар тохиролцов. Үүнд:

• Мэргэжлийн боловсрол, сургалтын шаталсан тогтолцоог хөгжүүлэх, бакалаврын шатны үргэлжлүүлэн суралцах боломжоор хангах
• Сургалтын хөтөлбөрийг уялдуулан боловсронгуй болгох, чанарын баталгааг хангах чиглэлээр хамтран ажиллах
• Багш, суралцагч солилцоо, дадлага, сургалт зохион байгуулах
• Орон нутгийн хөдөлмөрийн зах зээлийн хэрэгцээнд нийцсэн мэргэжилтэн бэлтгэх, хүний нөөцийн хөгжилд хамтран хувь нэмэр оруулах зэрэг болно

Харин Политехник коллежийн төгсөгчдөд дараах боломжууд бүрдэж байна. Үүнд:

• ЭЕШ-ийн шаардлагагүйгээр сургалтын хөтөлбөрийг дүйцүүлэн ШУТИС-ийн Геологи, уул уурхайн сургуульд 2 буюу 3 дугаар курсээсээ үргэлжлүүлэн суралцах 
• Уул уурхайн ашиглалтын технологи, ашигт малтмалын баяжуулалтын технологи, уурхайн машин тоног төхөөрөмж, геологи, газрын тосны инженерчлэл болон бусад тэргүүлэх, эрэлттэй мэргэжлийн чиглэлүүдээр дээд боловсрол эзэмших
• Мэдлэг, ур чадвараа ахиулах замаар амжилттай карьераа эхлүүлэхэд бодит дэмжлэг болох юм.